مخاطر تسويق السيناريو بدون خبرة
مخاطر تسويق السيناريو بدون خبرة
الكل عايز شغله اللى تعب فيه يتم نشرة كرواية . أو اذاعته بصورة مرئية كفيلم او مسلسل .
وعشان كده كل الناس بتفكر فى طريقة التسويق ، وبتسأل دايما ، ازاى اسوق شغلى ؟
وكتير منا وانا معاكوا بنحس باحباط وشعور بايخ ،لو تعبنا فى عمل لينا ، وملقناش طريقة نسوق بيها ، لكن لازم تفهموا ان السوق له متطلبات .
يعنى ايه الكلام ده ؟
السوق دلوقتى مثلا شايف ان الرعب هيبقى الحصان الرابح ، فا تلاقى كل الناس بتكتب رعب ، وكل المنتجين بيطلبوا رعب .
وممكن تلاقى نفسك كاتب عمل مميز جدا رومانسي أو اجتماعى مثلا ، بس السوق مش محتاجة دلوقتى .
حل مشكلة متطلبات السوق ، والحد من مخاطر تسويق السيناريو بدون خبرة .
وعشان كده بقول نعمل معالجات على حسب احتياجات السوق لآن المعالجة مجهودها اقل طبعا من الفيلم او المسلسل.وممكن شخص يتسائل ويقول ( بس كده ممكن مانعرفش ندرب نفسنا على كتابة السيناريو بحرفية ـ لاننا طول الوقت هنكتب معالجات).. ؟؟
وكلامة مليون المية صح .
يبقى الحل ايه ؟
الحل اننا نتدرب باستمرار على كتابة السيناريو وحرفيته على أى عمل عندنا ( غير مطلوب دلوقتى فى السوق) ، ونتدرب فيه على ايقاع جمل الحوار ، وايقاع المشاهد ، ونشوف العمل تجارى ولا محتاج بهارات السوق طالما كده كده شغالين عليه .
والأهم نشوف ... هل موجود فيه حبكات تشد الجمهور والمنتجين والممثلين عشان لما يجى وقته يتوافق عليه ؟
وهتلاقوا بعض الحبكات فى مقالات اخرى ، وايضا كيفية كتابة سيناريو احترافى .
سبب النقاش فى مخاطر تسويق السيناريو
بس ده كان ردى عليها .. وحبيت انشره هنا عشان تفهموا سر ( الفكرة ) سر (السطرين ) .. سر ( الفلوس) .
بعد اذن الجميع . هتكلم عن تجربة شخصية ... عشان تبقوا فاهمين بس نقطة مهمة جدا... اللى هيسرقك مش بيبقى عايز فيلم كامل ولا مسلسل كامل يسرقة ...اللى الناس مش فاهماه كويس ... ان ( الفكرة ) اللى هى نقدر نقول عليها اللوج لاين . أو الملخص . هى الفلوس . هى اللى بيتبنى عليها العمل بعد كده . والكتاب كلهم بيدوروا على فكرة مطرقعة وجديدة تشد الجمهور ... يعنى مجرد ما اعمالكم هتتحط على الموقع ده . انتوا كده بتقولوا للى عايزين يسرقوا ( تعال خد فكرة ، وماتدفعش ولا انهاردة ولا بكرة ، وكمان اسرقنى براحتك لو نسيت الفكرة خوش بص عليها تانى )!!!
لأنه هياخد فكرة العمل اللى يحس انها تجارية ، ويقوم هو بانى عليها عمل جديد تماما له ، وبكده فكرتك انت اتحرقت .
وارجو . وخدوها منى نصيحة .. أى شغل فى الدنيا فيه ابداع ،ويتم عرضه علني ، كده اتسرق بدون جدال وبدون ذرة شك .
وعشان كده اى بوست فيه شخص بيقول انا عندى فكرة كذا وكذا وعايز احوله سيناريو برفض اوافق عليه . لانه مش فاهم ان هى دى الفلوس .
وبرضه عشان يبقى كلامى واضح ، مش بقول ماتسجلوش شغلكوا كامل . لأ طبعا لازم تسجلوا . بس حافظوا على قوة الفكرة . مش أى حد يقولك فيلمك بيتكلم عن ايه . تقوله كذا وكذا.
و ممكن تقول النوع ( اكشن - رعب - رومانسي )
لكن تحرق فكرة عملك بكام كلمة . حرام عليك مجهودك .
ويارب يكون كلامى اتفهم كويس
صح الكلام....وشكرا...جذاك الله كل خير
ردحذف